,,Leiklist fyrir alla”

Halaleikhópurinn var stofnaður 27. september 1992 með það að markmiði að ,,iðka leiklist fyrir alla” og hefur starfað óslitið síðan. Við höfum sett upp veglega leiksýningu á hverju ári, stundum fleiri en eina, sjö leikrit hafa verið frumsamin fyrir leikhópinn og hafa þær jafnan vakið mikla athygli.

Þar sem leikhópurinn er samansettur af ólíkum einstaklingum, fötluðum sem ófötluðum, verður fjölbreytnin meiri og þar af leiðandi túlkunin. Þannig hefur hópurinn opnað augu almennings fyrir því að fatlað fólk getur einnig, þrátt fyrir ýmsar hindranir, leikið á sviði eins og allir aðrir.

Þetta áhugaleikfélag hefur lyft grettistaki í að eyða fordómum og styrkja einstaklinga til að taka skref, sem annars hefðu verið ófarin og styrkir því marga Halafélaga á einn eða annan hátt.

Fötlun er eitthvað sem gleymist í þessu áhugaleikfélagi.

Fyrsta sýning hópsins var ,,Aurasálin eftir Moliere og aðrar fylgdu í kjölfarið. Af þeim sýningum má nefna, ,,Allra meina bót” eftir þá Jón Múla og Jónas Árnasyni, ,,Gullna Hliðið” eftir Davíð Stefánsson, ,,Túskildingsóperuna” eftir Berthold Brecht, ,,Rómeó og Ingibjörg” eftir Þorstein Guðmundsson og árið 2001 settum við upp ,,Nakinn maður og annar í kjólfötum” eftir Dario Fo. „Á fjölum félagsins“ eftir Unni Maríu Sólmundardóttir og „Fílamanninn“ eftir Bernard Pomerance, Kirsuberjagarðinn eftir Tjakov, Pókók eftir Jökul Jakobosson, svo má lengi telja. En nákvæma upptalningu á verkum félagsins má finna á leikverka síðunni.

Öflugt félagslíf hefur einnig verið innan Halaleikhópsins, haldnir fundir, námskeið, borðað saman, horft á vídeo, sungið í Karooke og alls kyns skemmtilegir hlutir í gangi mest allt árið í Halaleikhúsinu sem Sjálfsbjörg lsf. lætur okkur í té endurgjaldslaust. Einnig hittumst við á sumrin og stundum leiklestur og njótum náttúrunnar í sumarhúsi Sjálfsbjargar á höfuðborgarsvæðinu við Elliðavatn.